Pedagogarnir samráðast aftur í desember

Pedagogfelagið og lønardeildin í Fíggjarmálaráðnum samráddust aftur í gjár, men komið varð ikki á mál. Nýggjur fundur avtalaður fyrst desember, sigur Maud Vang Hansen, forkvinna í Pedagogfelagnum.

Hon heldur ikki stórvegis møguleikar vera fyri at fáa meiri í løn, enn aðrir bólkar hava fingið, og tað hevur lønardeildin eisini gjørt greitt.

Nýggj semingslóg

Tað eru onnur viðurskifti, sum eru við í samráðingunum. Millum annað er nýggj semingslóg samtykt, sum áleggur pørtunum á arbeiðsmarknaðinum fráboðanarskyldu, tá talan er um verkfall. Higartil hava bert Føroya Skipara- og Navigatørfelag og Maskinmeisrafalegaið gjørt slíka avtalu, og hon er 48 tímar.

Nýggja eftirlønarskipanin, sum kemur í gildi 1. januar, er eisini eitt av málunum í samráðingunum millum Pedagogfelagið og lønardeildina. Nýggja skipanin fær stórar avleiðingar fyri limir í Pedagogfelagnum, og tí má ein loysn finnast, sigur Maud Vang Hansen.

Hon heldur kortini ikki, at tað er serliga langt millum partarnar, og hon væntar eina semju.