VÍF og VB skulu spæla umaftur

Tann 27.oktober vunnu kvinnurnar hjá VÍF 37-28 á VB í Vestmanna, men nú skal dysturin spælast umaftur, tí VB hevur fingið viðhald í kæru.

VB kærdi dagin eftir dystin, og vísti á, at fleiri brot vóru á hondbóltsreglurnar:

1. At dómaraborðið sum VÍF hevur sett ikki kannar dómaraseðilin og útskiftingarumráðið

2. At dómaraborðið gevur VB loyvi at skriva Leilu Jespersen á dómaraseðilin, hóast hetta ikki er loyvt sambært reglugerðini

3. At Leila Jespersen verður sektað við tveimum minuttum fyri ikki at standa á dómaraseðlinum

4. At Gurið Mortensen, leikandi venjari hjá VB, verður strikað av dómaraseðlinum í samband við, at Leila Jesepersen verður skrivað á hann, og ikki fær loyvi frá dómaraborðinum at koma aftur á dómaraseðilin, tí at dómaraborðið boðar frá, at tað er ov seint, men er í staðin á útskiftingarbonkinum hjá VB allan dystin. 

5. At VÍF sum er fyriskipari av dystinum, hevur nýtt ein gamlan dómaraseðil, har pláss bert er fyri fjúrtan leikarum. VB kærir harumframt, at dómaraborðið ongantíð undir dystinum ger vart við, at skeivur dómaraseðil til fjúrtan leikarar er nýttur

VÍF er eisini hoyrt í málinum, og er av teirri fatan, at VB hevur ein stóran part av ábyrgdini fyri, at teir feilir, sum eru hendir í dystinum, eru hendir. Har afturat er VÍF av teirri fatan, at teir feilir sum eru hendir, einans hava verið til fyrimuns fyri VB.

Aganevndin hevur gjørt úrskurð í málinum, og vísir millum annað á, at allir partar (dómaraborð, VÍF, VB og dómarar) eiga sín leiklut í, at hesir feilir eru gjørdir. Men tað er VÍF sum heimalið sum fær høvuðsábyrgdina av mistøkunum, tí felagið hevur heimavøll og tí ábyrgd av tíðtakara og skrivara í dystinum.

Aganevndin hevur tí gjørt av, at nýggjur dystur skal spælast millum VÍF og VB í Vestmanna skjótast til ber.

Allur úrskurðurin í málinum kann lesast her: http://www.hsf.fo/wp-content/uploads/2013/11/4934_001.pdf