Samráðast við Grønland um fiskirættindi

Sínámillum samráðingar um fiskiveiðuavtalu ímillum Føroyar og Grønland fyri 2014 eru í Keypmannahavn í dag og í morgin.

Talan er ikki um ovurhonds stórar nøgdir, sum londini kunnu fiska hjá hvørjum øðrum, men talan kann vera um eitt ískoyti hjá ávísum skipabólkum.

2.000 tons av sild

Í ár hava grønlendsk skip havt loyvi at fiska 2.050 tons av sild í føroyskum ella í altjóða sjógvi, og grønlendingar hava havt loyvi at fiska nakað av sínu svartkjaftakvotu í føroyskum sjógvi.

Og so hevur ein grønlendskur línubátur havt loyvi at verið á royndarveiðu í føroyskum sjógvi eftir botnfiski í 60 dagar.

100 tons av svartkalva

Føroysk skip hava í ár havt loyvi at fiskað 100 tons av svartkalva í Vesturgrønlandi.

Haraftrat hava tríggir føroyskir trolarar ella línuskip havt loyvi at verið á royndarveiðu í Eysturgrønlandi, har tey hava havt loyvi at fiska 225 tons av toski og 275 tons av kalva ella svartkalva.

Og tvey føroysk rækjuskip hava havt loyvi at fiska 100 tons av rækjum í Eysturgrønlandi sum royndarveiðu. Í fjør samdust londini um avtaluna í Keypmannahavn tann 7. desember.

Lidnir í morgin

Samráðingarnar fyri næsta ár byrjaðu í dag, og ætlanin er at vera komin á mál í morgin. Umboð fyri Fiskimálaráðið og fyri vinnuna eru á fundinum í Keypmannahavn.