Strandferðslan: Frágreiðing kemur fríggjadagin

Fríggjadagin fáa Johan Dahl og Vinnumálaráðið eina frágreiðing frá grannskoðaranum hjá Strandfaraskipum landsins um fíggjarligu støðuna hjá stovninum tann 30.november.

Og í nátt vísti landsstýrismaðurin aftur í skrivi til løgtingið og Fíggjarnevndina, at hann hevur dult fyri løgtinginum, hvør veruliga støðan var hjá Strandferðsluni.

Johan Dahl sigur, at bæði løgtingið og Fíggjarnevndin fingu at vita, at Strandfaraskip landsins skuldu brúka 143,8 milliónir í ár og fekk 139 milliónir í fíggjarlógini. Tí noyddist stovnurin at spara í 2013.

Stjórin visti ikki av

Johan Dahl sigur eisini, at fíggjarleiðarin hjá Strandferðsluni, Hans Petur Joensen, sendi sunnudagin limunum í Fíggjarnevndini teldubræv um fíggjarligu støðuna uttan at stjórin, Bogi Mortensen, visti av tí. Í brævinum skuldsetur fíggjarleiðarin Johan Dahl fyri at dylja upplýsingar fyri løgtinginum,

Bogi Mortensen er ikki til arbeiðis fyri sjúku í tríggjar vikur. Johan Dahl hevur sett Hans Jóhannes á Brúgv sum fyribils stjóra á Strandfaraskipum landsins.