Thorning brynjar seg til valstríð

Nýggjársrøðan hjá danska forsætisráðharranum, Helle Thorning Schmidt, var byrjanin til eitt valstríð. Tað halda politiskir viðmerkjarar á donskum bløðum í dag, skrivar ritzau.

Politiken skrivar í oddagrein, at Thorning kemur út sum sosialdemokratur, og at røðan er fyrsta skotið í valstríðnum, sum fer at merkja 2014.

Hetta var ein røða fyri sosialdemokratum, men talan var ikki um eina vinstrahalla røðu, skrivar politiski blaðstjórin á Fyens Stiftstidendes, Elisabet Svane.

Eisini Kristeligt Dagblad heldur, at røðan bar brá av vali.

- Tað var sjónligt, at Helle Thorning-Schmidt valdi at halda fast við evni, sum stjórnarflokkarnir halda er best egnað til at vinna næsta val við. Og evnið ongin vøkstur ella vælferð kann vísa seg at vera eitt gott val, heldur blaðið.

Jyllands-Posten heldur, at røðan er eitt tekin um, at Thorning miðar eftir fíggjarligum framburði, og at hetta er eitt tekin um, at stjórin fer at halda fram við nýskipanarpolitikkinnum.
Danski forsætisráðharrin nevndi ikki Føroyar í nýggjársrøðu sínari.