Yvirskipaðan politikk fyri skapandi vinnur

Síðst í januar fer løgtingið at biðja landsstýrið koma við einari heildarætlan um yvirskipaðan politikk fyri skapandi, kreativar, vinnur, millum annað filmslist.

Tað spurdist burtur úr uppskotinum til samtyktar hjá Tjóðveldi um at orða yvirskipaðan filmspolitikk og stovna filmsgrunn.

Nú uppskotið er viðgjørt í Mentanarnevndini, er nevndin samd um at heita á landsstýrið um at fyrireika og leggja frágreiðing fyri løgtingið um uppskot um heildarætlan um yvirskipaðan politikk fyri kreativar vinnur, herundir film. Skapandi vinnur veksa skjótari enn so nógvar aðrar vinnur í heiminum. 

Eingin ætlan

Í Føroyum er eingin yvirskipað ætlan, sum fevnir um eitt nú film, telduspøl, tónleik, bókmentir, sniðgeving og matgerð. Tí er brúk fyri einari heildarætlan, sigur Mentanarnevndin, sum hevur broytingaruppskot til uppskotið hjá Tjóðveldi, so tað umfatar alla skapandi vinnu, ikki bara film.  

Tingfundur verður ikki aftur fyrr enn síðst í januar, tí Vinnunevndin fer til Kina. Atkvøtt verður um uppskotið um skapandi vinnur tann 30.januar.