Uni og Jørgen ósamdir um tunnilsgjald

Ósemja er millum stjóran í tunnilsfeløgunum og landsstýrismannin í fíggjarmálum um gjaldið at koyra í undirsjóvartunlunum

Við Sosialin sigur Uni Danielsen, stjóri í tunnilsfeløgunum, at lánini í Vágatunnilin og Norðoyartunnilin eru skjótt afturgoldin - fyrr enn ætlað. Men stjórin í tunnilsfeløgunum ger greitt, at hetta merkir ikki, at tað verður ókeypis at koyra í tunlunum.

Dýrir at reka

Ábøtur og røkt av tunlunum kostar millum 12 og 16 milliónir krónur árliga, og tí er neyðugt við einum bummgjaldi. Og so liggur tað politiskt eisini í kortunum, at peningurin, sum landið setti í tunlgarnar, skal verða afturgoldin, áðrenn tað verður ókeypis at koyra. Talan er um góðar 400 milliónur krónur.

Enn er ikki ásett, nær hesin peningur skal verða afturgoldin, staðfestir Uni Danielsen, tunnilsstjóri, í samrøðuni við Sosialin.

Men Jørgen Niclasen, landsstýrismaður í fíggjarmálum, er ósamdur við Una Danielsen:

- Landið hevur gjørt eina politiskta, moralska avtalu við brúkararnar, at tá lánini til vórðu útgoldin, skuldi tað verða ókeypis at koyra. Ta avtaluna ætlar Jørgen Niclasen, landsstýrismaður í fíggjarmálum, sær at halda. 

Skal ikki gjaldast aftur

Men í lógini um undirsjóvartunlarnar stendur, at lántøka og íløgan hjá landsstýrinum skulu vera afturgoldin. Hetta vísti Kaj Leo Holm Johannesen, løgmaður, eisini á, í  svarið til fyrispurning frá Poul Michelsen, løgtingsmanni. 

Jørgen Niclasen, landsstýrismaður í fíggjarmálum, hevur eina aðra fatan, saman hvat lógin sigur. Við Sosialin sigur hann:

- Tað hevur alla tíðina ligið í kortunum, at parturin hjá landinum skuldi ikki gjaldast aftur.