Stjórar skulu ikki hava fráfaringarløn

Tað kostar landinum ov nógv at sleppa sær av við almennar stjórar.

Tað heldur landsstýrismaðurin í fíggjarmálum.

Eina viku fyri jól sendi Fíggjarmálaráðið øllum aðalráðunum stutt bræv, har sum aðalráðini verða biðin um ikki at geva stjórum serliga fráfaringarsamsýning.

Løn og samsýning

Í brævinum stendur, at í stjórasáttmálunum hjá landinum eru ásetingar um fráfaringarsamsýning, tá stjórar verða uppsagdir. Umframt uppsagnarløn í seks mánaðir, fáa stjórarnir fráfaringarsamsýning, sum svarar til seks mánaðarlønir afturat. 

Landsstýrismaðurin í fíggjarmálum vil ikki, at tílík samsýning verður í nýggjum stjórasáttmálum, stendur í brævinum frá Fíggjarmálaráðnum. 

Aðalráðini eru tí biðin um ikki at gera stjórasáttmálar við serligari fráfaringarsamsýning.