Heilsumálaráðið vil hava Apoteksgrunnin avtiknan

Apoteksgrunnurin eigur ikki at vera ein forðing fyri, at landsstýrið kann brúka avlopið hjá apotekunum, sum tí lystir. Tí skal Apoteksgrunnurin strikast.

Fíggjarnevndin hjá løgtinginum er orsøkin til uppskotið. Tá nevndin viðgjørdi eina eykajáttanarlóg í fjør, vildi hon ikki loyva landsstýrismanninum í heilsumálum at geva sjúkrahúsverkinum avlopið hjá apotekunum.

Fíggjarnevndin segði kortanei, tí sambært apotekslógini skal rakstraravlopið hjá Apoteksverkinum í Apoteksgrunnin.

Landsstýrismaðurin boðaði tá Fíggjarnevndini frá, at hann fór at leggja lógaruppskot fyri løgtingið um at strika hesa áseting. Tað lógaruppskotið hevur nú verið á landsstýrisfundi og er sent til hoyringar.

Verandi praksis skal formaliserast

Endamálið er, sambært Heilsumálaráðnum, at fáa veruleikan viðvíkjandi Apoteksgrunninum staðfestan í lógini, "at formalisera verandi praksis," sum skrivað er í viðmerkingunum um lógaruppskotið.

Fíggjarmálaráðið tekur undir við Heilsumálaráðnum. Apoteksgrunnurin varð stovnaður í 1949, tá heimastýrið yvirtók Apoteksverkið.

Í 1999 samtykti løgtingið at seta Apoteksverkið í fíggjarlógina, bæði rakstur og íløgur. Við hesum gjørdist Apoteksgrunnurin eitt eiti uttan veruligt innihald, sigur Heilsumálaráðið.

Í landsroknskapinum sæst, at einki er bókað á rakstrinum hjá grunninum síðani 2001. Einasta ogn hjá grunninum er ein áogn mótvegis skuldarum. Hon er góðar 80.000 krónur.