Makrelurin: 0,8 prosent skilja partarnar

0,8 prosent skilja partarnar í trætuni um makrelkvotuna. Og tey 0,8 prosentini skulu finnast í heildini, so talið 100,8 prosent enda á 100 prosentum, sum skulu býtast millum strandarlondini.

Tað váttar føroyski samráðingarleiðarin Herluf Sigvaldsson. Hann sigur eisini, at heildarkvotan av makreli verður væntandi munin størri enn tey knappliga 900.000 tonsini, sum fiskifrøðingarnir í ICES mæla til.

Kann verða nógv

0,8 prosent ljóða ikki av nógvum. Men tá talan er um so stórar nøgdir, blíva 0,8 prosent nógv kortini. Verður heildarkvotan til dømis ein millión tons, eru 0,8 prosent 8.000 tons. Og er kiloprísurin til dømis fimm krónur er talan um 40 mió. kr.  

Samráðingarnar um makrelin verða tiknar upp aftur í London klokkan seks í annaðkvøld. ES hevur samráðingarleiðsluna nú í 2014, og John Spencer, samráðingarleiðarin hjá ES, mælti í gjár til at halda fram við samráðingunum í morgin. Føroyar svaraðu longu í gjár, at tað er í lagi. Ísland svaraði eisini ja í gjár, og fyrrapartin tók Norra undir við tilmælinum hjá John Spencer.

Norðhavssild og svartkjaftur

John Spencer hevur sagt, at til ber at halda fram við samráðingunum um makrelin hósdagin og fríggjadagin. Klokkan tvey í morgin byrja samráðingarnar um norðhavssildina. Tær verða eisini í London. Ísland, sum hevur samráðingarleiðsluna í ár, hevur sett tveir dagar av til norðhavssildina. Og í morgun byrjaðu samráðingarnar um svarkjaftin. Tær eru eisini í London.