Umhvørvisstovan skal umsita navnamál

Á landsstýrisfundi mánadagin var upprit og uppskot um kunngerð at flyta umsitingina av navnamálum til Umhvørvisstovuna til viðgerðar.

Jacob Vestergaard, landsstýrismaður í fiskivinnumálum, sigur, at tá innlendismálaráðið í fjør summar varð niðurlagt, vórðu umsitingarøkini hjá niðurlagda ráðnum býtt sundur millum hini ráðini. 
Á landsstýrisfundinum mánadagin varð avgjørt, at Umhvørvisstovan sum hoyrir undir Fiskimálaráðið, sum framman undan umsitir matrikkulmál, tinglýsingar og umhvørviðsmál, nú eisini skal hava navnamál undir sær.

Navnamál verða viðgjørd í navnanevndini. Og nevndin er júst mannað av nýggjum. Í navnanevndini sita nú: 

Heri Joensen, sóknarprestur 
Anfinnur Johansen, málfrøðingur
Hanna Magnusson, fólkaskúlalærari 

Varalimir eru: 

Maria Jørdal Niclasen, sóknarprestur
Kristin M. Magnussen, málfrøðingur
og Magni Joensen, fólkaskúlalærari