Tunnilin: Lív bíðar eftir løgtinginum

<p>Lív ger einki við Eysturoyartunnilin, fyrr enn politiska semjan er staðfest í løgtinginum og almenna partafelagið, sum skal gera og eiga tunnilin, er stovnað.</p>

<p>Lív eigur P/f Skálafjarðartunnilin og 20 prosent í partafeløgunum, sum Copenhagen Infrastructure Partners stovnaðu í Føroyum í juni í fjør.</p>

<p>Lív gjørdi samstarvsavtalu við PensionDanmark, sum eigur pengarnar, Copenhagen Infrastructure Partners skuldu gera íløguna fyri í Føroyum.</p>

<p><strong>Støðan óbroytt</strong></p>

<p>Feløgini, sum vórðu stovnað í fjør summar, eru Eysturoyartunnilin og Faroese Infrastructure Holding.</p>

<p>Lív-samtakið, sum landsstýrið framvegis eigur, var einasti íleggjari í Føroyum, sum hevði álit á privatu loysnini á Skálafjarðartunlinum.&nbsp;</p>

<p>Støðan hjá Lív er tann sama í dag sum hon var í fjør summar. Stjórin í Lív, Jan Jakobsen, og nevndarformaðurin, Finn Danberg, siga báðir, at Lív bíðar eftir endaligu avgerðini um almennu loysnini, sum politisk semja nú er um.</p>

<p><strong>Eigur kanningarúrslit</strong></p>

<p>P/f Skálafjarðartunnilin, sum Lív eigur, hevur seismiskar kanningar, sum vórðu gjørdar fyri nøkrum árum síðani á leiðini, har sum tunnilin millum Eysturoynna og Streymoynna skal vera.&nbsp;Kanningarnar siga, hvussu jarðfrøðiligu viðurskiftini eru undir Tangafirði og Skálafirði.&nbsp;</p>

<p>Hesar kanningar kann almenna partafelagið, leggur tað í, keypa frá P/f Skálafjarðartunlinum, so almenna felagið sleppur undan at gera kanningarnar av nýggjum.</p>

<p>Hvørki stjórin ella nevndarformaðurin vilja siga, hvussu nógv, seismikkurin kostar. Men partapeningurin í Skálafjarðartunlinum er 11,8 mió. kr.</p>