Makrelstovnurin størri enn higartil mett

Tá hendan vikan er farin, ber til at taka støðu til næsta fund millum strandarlondini um makrelin.

Hesa vikuna viðger ICES, altjóða havgranskingarstovnurin, grundarlagið fyri einari nýggjari og betri vísindaligari ráðgeving um makrelin í Norðuratlantshavi. 

Okkurt er, sum bendir á, at makrelstovnurin er nógv størri, enn ICES higartil hevur mett.  

ICES hevur fund í Keypmannahavn hesa vikuna.

Í næstu viku, tá strandarlondini hava úrslitið frá fundinum í Keypmannahavn, fer ES, sum stendur fyri makrelsamráðingunum nú í 2014, væntandi at boða til næsta samráðingarfundin um makrelbýtið í ár.

Fyrst í hesum mánaðinum vóru samráðingar í Bergen, og tá var ikki langt millum partarnar. Men semja fekst tó ikki. Sannlíkt er, at samráðingarnar halda fram fyrst í mars.