Skúvoyarferjan verður nú umvæld

Skipið, sum er keypt úr Niðurlondum fyri 2,4 milliónir krónur, kom til landið fyrst í januar, og síðani hevur Strandferðslan fyrireikað útbjóðingartilfarið.

Hálv fjórða millión krónur er tøk at umvæla og uppstiga fyri.

Ætlanin er m.a. at skifta báðar motorarnar, at seta nýggjan krana í, at sandblása og mála skipið.

Hvussu nógv verður gjørt, veldst um, hvussu langt játtanin røkkur.

Um hálvan mars verður væntandi greitt, hvør fær arbeiðið.

Hvussu langa tíð, tað fer at taka, er ikki greitt, men ætlanin er, at nýggja skúvoyarskipið skal setast í sigling í mai mánaði.

Skipið, sum er smíðað í 1993, tekur 36 ferðafólk umframt farm.

Tað hevur fingið navnið Sildberin, og gamli Sildberin, sum er frá 1979, hevur fingið navnið Skúvoy.