Kringvarpið: Samgongan bíðar eftir landsstýrinum

Samgongan bíðar eftir landsstýrinum, og vil tí ikki taka undir við einum uppskoti hjá Tjóðveldi og Javnaðarflokkinum um at hjálpa Kringvarpinum og hinum fjølmiðlunum í Føroyum.

Sambært uppskotinum skal Kringvarpið fáa meirvirðisgjaldið av kringvarpsgjaldinum, 11,5 mió. kr. um árið. Men handilslýsingar og sponsorar skulu vera forboðin í Kringvarpinum. Sjónvarpslýsingar kunnu tó halda fram, men pengarnir haðani, 1,3 mió. kr., skulu brúkast til sokallaðan demokratistuðul, sum skal stimbra eitt fjølbroytt og nýskapandi miðlalandslag.  

Ikki kappast við privatar

Kringvarpið skal ikki hava fyri neyðini at kappast við privatu miðlarnar um lýsingarpengar, siga Javnaðarflokkurin og Tjóðveldi.

Men meirilutin í Mentanarnevndini, Bjarni Djurholm, Edva Jacobsen, Jóna Mortensen og Jenis av Rana, sum øll eru í samgonguni, mælir løgtinginum frá at samtykkja uppskotið. Tey vísa á, at landsstýrið arbeiðir við at gera Kringvarpinum nýggjar karmar.