Myndugleikarnir: Harðari revsing fyri rúsevni

<p>Tað er umráðandi, at revsingin er harðari í Føroyum enn í Danmark, tá lógin um rúsevni er brotin. Smáar nøgdir av rúsevnum gera størri skaða í Føroyum, sum er eitt so lítið samfelag, halda myndugleikarnir.</p>

<p>Rúsevni kosta nógv meira í Føroyum. Tey, sum selja rúsevni í Føroyum hava nógv størri vinning enn tey, sum til dømis selja í Danmark.</p>

<p>Dómsvaldið, eisini Landsrætturin, hevur í nógv ár dømt harðari í rúsevnismálum í Føroyum enn í Danmark. Tann rættarvenjan skal varðveitast, halda bæði fútin og landsstýrismaðurin í heilsumálum.</p>

<p><strong>Revsingin fyri lítil brot ov lin í Føroyum</strong></p>

<p>Eitt uppskot um at dagføra og herða donsku lógina um rúsevni, sum er galdandi í Føroyum, er á veg í løgtingið.</p>

<p>Í Danmark ber til at revsa lítil brot á rúsevnalógina við ávaring. Men fútin heldur, at hetta er ov lin revsing í Føroyum. Landsstýrismaðurin í heilsumálum er samdur við fútan.</p>

<p><strong>SÍ EISINI <a href="http://kvf.fo/greinar/2014/03/21/login-um-rusevni-skal-herdast-munandi">Lógin um rúsevni skal herðast munandi</a></strong></p>

<p>Ásetingin um ávaring er tí strikað í ríkislógartilmælinum. Fútin stúrir fyri, at ásetingin um ávaring kann tulkast sum um lógin er linkað í Føroyum.</p>

<p>Í Føroyum er vanligt at geva bót, verður lógin um rúsevni brotin, hóast talan er um smávegis nøgdir av rúsevnum.</p>