Minnilutin mælir frá at samtykkja avlurtingarpakka

Stóru andstøðuflokkarnir vilja ikki loyva tí, sum teir kalla eitt stórt inntriv í privata frælsið hjá føroyingum.

Minnilutin í Rættarnevndini, Páll á Reynatúgvu og Kristin Michelsen, mælir løgtinginum frá at samtykkja avlurtingarpakkan. Rætturin til eitt frælst og óskert privatlív eigur at vinna á rættinum hjá statinum so víðfevnt at sneyta í øllum okkara privatu viðurskiftum, siga teir báðir tingmenninir. 

Teir siga eisini, at uppskotið rakar ov breitt og skeivt. 

Leggur ikki upp fyri internet-telefoni

Tað er komið fram í Rættarnevndini, siga teir, at tøknin í uppskotinum ikki tekur atlit at samskifti á netinum, heldur ikki internet-telefoni, so sum Skype og Wiper. Páll á Reynatúgvu og Kristin Michelsen mæla tinginum til at strika alt í ríkislógarmælinum, sum hevur við sær inntriv í fráboðanarloyndina, eftirlit, dátuavlesing, og sum bronglar ella avbrýtur radio- ella telesamskifti.  

Samgongan vil geva løgregluni størri heimildir

Men samgongan í Rættarnevndini tekur undir við at geva løgregluni størri heimildir til at avlurta telefonir hjá fólki, sum eru undir illgruna. Politiið hevur biðið um at fáa víðari heimildir, og løgmaður legði fyrst í november ríkislógartilmæli fyri løgtingið um at broyta rættargangslógina í Føroyum. 

Meirilutin í Rættarnevndini sigur, at leingi hevur verið átrokandi at fingið dagført rættargangslógina fyri Føroyar. Broytingin, sum nú skal gerast, skal geva løgregluni betri møguleikar at kanna grov brotsverk.  

Videoavhoyring

Ein onnur broyting er um at videoavhoyra børn. Videoavhoyring av børnum verður brúkt millum annað í málum um kynsligan yvirgang.  Hetta verður gjørt fyri at barnið ikki noyðist at geva frágreiðing á rættarfundi, har sum nógv fólk eru, eitt nú fólkið, sum er ákært fyri at hava gjørt seg inn á barnið.

Videoavhoyringar verða longu brúktar í Føroyum, men nú skulu greiðar reglur um tær setast í rættargangslógina. Børn, sum eru 12 ár ella yngri, kunnu avhoyrast á sjónband.  Men Rættarnevndin, og her er nevndin samd, vil hava aldursmarkið hækkað upp í 15 ár. Men har er neyðugt at bíða eftir danska Løgmálaráðnum, sum hevur avgjørt at viðgera spurningin um at hækka aldursmarkið, eisini í Danmark og Grønlandi.  

11 fundir í nevndini

Hetta arbeiðið verður liðugt seinast í hesum árinum. Og tá er Løgmálaráðið sinnað at gera uppskot um broyting í føroysku rættargangslógini, so aldursmarkið eisini verður 15 ár í Føroyum.  Rættarnevndin fekk málið 14.november og viðgjørdi tað á 11 fundum, áðrenn nevndin helt seg til at skriva álit.