Spyrja um tey eru nøgd við barnaansing í Klaksvík

Klaksvíkar kommuna ger nú eina nøgdsemiskanning av barnaansingarøkinum í kommununi. Æltanin við kanningini er at geva hvørjum einstøkum stovni amboð til at eftirmeta og menna sína tænastu. 

Spurt verður millum annað um tænastur, veitingar og umstøður, og hvørjar tillagingar eiga at verða gjørdar.

Byrjar í næstu viku

Kanningin byrjar í næstu viku, tá starvsfólk fáa spurningar at svara, og eftir páskir fáa foreldur spurningarnar sendandi. Klaksvíkar kommuna miðar eftir, at úrslitið av nøgdsemiskanningini verður greitt í juni. Tað er trivnaðarnevndin í Klaksvíkar kommunu, sum skipar fyri kanningini.

Kommunan gjørdi líknandi kanning í 2010, og ætlinin er javnan at gera slíka kanning.