Flaggið upp eftir hvíta listanum

2014 verður vónandi árið, tá føroyska flaggið ger eitt stórt lop upp eftir á hvíta listanum við skipum, sum lúka krøvini, sett vera til skip. Listin eitur hvíti listin hjá felagsskapinum Paris Mou.  

Tað sigur Sjóvinnustýrið eftir úrslitið fyrsta ársfjórðing í ár. 

Árið byrjaði ikki so væl, tí síðst í 2013 varð eitt skip undir føroyskum flaggi afturhildið í útlendskari havn. 

Men hóast fremmand skipaeftirlit hava kannað nógv føroysk skip ár, er einki skip afturhildið higartil. 

Kortini vóru fleiri kanningar í fjør enn í ár. Í fyrsta ársfjórðingi í fjør vóru 46 kanningar. Tær vóru bara helvtina so nógvar í ár.

Hetta kann merkja, sigur Sjóvinnustýrið, at vit nú loksins síggja ágóðan av, at føroyska flaggið er á hvíta listanum. Skipini verða ikki kannað so ofta.

Talið av viðmerkingum um kannað føroysk skip er tó minkað lutfalsliga meira enn kanningartalið. Í fjør vóru 108 viðmerkingar, í ár 42.  

Sjóvinnustýrið sigur seg hava hert eftirlitið við skipum og feløgum,  sum hava vánalig úrslit ella ónøktandi úrslit.  Sjóvinnustýrið er farið undir eina eftirlitsherferð. Eftirlitsfólk gera eyka eftirlit á valdum skipum.  

Og klassafeløgini fáa boð um at fylgja málunum og tryggja, at kravdar rættingar verða gjørdar um borð á skipunum. 

Higartil eru seks skip kannað í ár. Á trimum skinum funnu eftirlitsfólkini umstøður, sum sannlíkt høvdu endað við, at skipini høvdu blivið afturhildin innan stutta tíð.

At annað hvørt skip ikki er í lagi merkir, at Sjóvinnustýrið valdi røttu skipini at kanna.  Eisini er hetta greið ábending um, at herferðin eigur at halda fram, sigur Sjóvinnustýrið .