Hvassar átalur um Vinnumálaráðið og SSL

Tað líkist ongum, at samskiftið millum Strandfaraskip landsins (SSL) og landsstýrismannin í vinnumálum og umsiting hansara tykist óskipað, ógreitt og skiftandi.

Tað siga løgtingsgrannskoðararnir í viðmerkingum sínum um roknskapin hjá Strandferðsluni í 2013. 

Tað er als ikki nøktandi, at roknskaparviðurskiftini hjá SSL hava verið ógreið.

Og løgtingsgrannskoðararnir átala hvassliga, at landsstýrismaðurin í vinnumálum ikki kunnaði løgtingið ella bað um eykajáttan, hóast hann visti, at játtanin hjá SSL ikki fór at halda.  

Eisini verður hvassliga átalað, at Vinnumálaráðið ikki gjørdi meira fyri at  fáa viðurskiftini í rætt lag, tá ráðið í oktober í 2013 sigur seg ikki hava álit á tølunum hjá SSL, og at ráðið kortini góðkennir greinaroknskapin uttan viðmerkingar.

Hvørki leiðslan, landsstýrismaðurin ella aðalráðið handfóru játtanar- og fíggjarviðurskiftini rætt. 

Og løgtingsgrannskoðararnir leggja afturat, at teir áttu at fingið tað at vita alt fyri eitt, at landsstýrismaðurin hevði biðið um serliga grannskoðanarfrágreðiing um SSL.