Løgmaður hevur fult álit á Jørgeni Niclasen

– "Eg havi fult álit á Jørgeni Niclasen, og Sambandsflokkurin fer ikki at atkvøða fyri einum misáliti á landsstýrismannin í fíggjarmálum", sigur Kaj Leo Holm Johannesen við in.fo

Og hóast Jørgen Niclasen hevur viðgingið, at hann ikki hevur sagt satt á tíðindafundinum um tollmálið, so heldur løgmaður ikki, at Jørgen Niclasen nakrantíð hevur sagt ósatt fyri sær. Tað segði hann við Rás 2 í dag.

Andstøðuflokkarnir umhugsa at leggja fram misálit á landsstýrismannin í fíggjarmálum, men løgmaður er ósamdur:

- "Eg haldi at eitt sindur av inflatión er komin í orðið ”álit”, sigur Kaj Leo Holm Johannesen við in.fo. Hann heldur seg einki hava fingið at vita, sum ger at hann missir álitið á sín landsstýrismann í fíggjarmálum.

Kaj Leo Holm Johannesen er staddur uttanlands, og kemur ikki aftur til Føroya fyrr enn í kvøld. Hann verður tí ikki við, tá tingbólkurin hjá Sambandsflokkinum seinni í dag fer at viðgera málið um Jørgen Niclasen. Men greitt er, at løgmaður hevur fult álit á Jørgeni Niclasen.