Bóltaði 30-40 metrar - fekk ongan skaða

Kvinnan í bilinum, sum fór út av landsvegnum oman fyri havnina á Sundi í gjárkvøldið, fekk ongan skaða.

Tað varð staðfest eftir kanningarnar á Landssjúkrahúsinum, hagar kvinnan, sum var einsamøll í bilinum, varð flutt eftir óhappið, sigur politiið í morgun. Tað var um hálvgum ellivu tíðina í gjárkvøldið, at ein persónbilur á veg norðureftir fór fram um ein betongbil. Men kvinnan, sum koyrdi persónbilin, misti tamarhaldið á bilinum og fór út av vegnum beint har, sum eitt glopp er í autoverjuni.

Bóltaði 30-40 metrar

Bilurin bóltaði tvær-tríggjar ferðir omaneftir og endaði á hjólunum 30-40 metrar niðan fyri vegin. Sjóverjuskipið Vædderen lá við bryggju á Sundi. Fólk umborð sóu óhappið henda, og lækni og onnur av skipinum fóru alt fyri eitt til hjálpar.

Kvinnan er ikki avhoyrd enn, so politiið veit ikki, hví óhappið hendi.