Ránsmálið kemur nú fyri rættin

Hósdagin í næstu viku fer Føroya rættur at viðgera ákærurnar móti tveimum monnum, sum eru ákærdir fyri rán uttan fyri BankNordik í Húsagøtu í Havn annað páskakvøld.

Føroya rættur fekk ákæruritini fríggjadagin.Menninir vóru varðhaldsfongslaðir til í dag. Men ákærin bað rættin leingja varðhaldsfongslingina til hósdagin í næstu viku.

Báðir menninir og verjar teirra mótmæltu tí, men dómarin gav ákæranum viðhald. 

Forboð fyri at endurgeva

Annars var, eftir áheitan frá ákæranum, sett forboð fyri at endurgeva tað, sum varð sagt á stutta rættarfundinum fyrrapartin. Orsøkin er, at vitnið í málinum, unga kvinnan, sum var fyri ráninum, skal ikki vita, hvat teir ákærdu hava sagt í rættinum.

Og vitnið er eisini orsøkin til, at menninir ikki sluppu úr varðhaldinum í dag.

Vandin fyri, at teir ávirka vitnið, var grundgevingin fyri, at bæði ákærin og dómarin vilja hava teir í varðhaldinum, til dómsviðgerðin byrjar hósdagin 12. juni klokkan níggju.