Helgi Abrahamsen: Stevning broytir einki

Helgi Abrahamsen, tingmaður fyri Sambandsflokkin, atkvøddi fyri misálitinum á Jørgen Niclasen, og hann heldur ikki, at tað, at Jørgen Niclasen ætlar at stevna Kringvarpinum og Portalinum, broytir nakað.

- Stevningin greiðir løgfrøðiligar spurningar. Okkara mál er politiskt, sigur Helgi Abrahamsen, sum ikki vil gera samrøðu við útvarpið í dag.

Helgi Abrahamsen heldur ikki, at stevningin greiðir nakað politiskt.

Broytir einki

- Eg dugi ikki at síggja, at hatta broytir politisku støðuna, sigur hann. 

Beinleiðis spurdur, um hann heldur, at Jørgen Niclasen skal frá sum landsstýrismaður, svarar Helgi Abrahamsen:

- Eg havi ikki broytt meining.

Reimund Langgaard, tingmaður fyri Sambandsflokkin, atkvøddi eisini fyri misálitinum á Jørgen Niclasen, hann vil ikki gera viðmerkingar í dag, men sigur, at hann er samdur við Helga Abrahamsen, at stevningin ikki broytir nakað.