Gunvør Balle spyr aftur um Anitu

Landsstýrismaðurin í fiskivinnumálum skal nú aftur svara spurningum um garnaskipið Anitu. 

Fyrst í mars í fjør fekk Fiskimálaráðið at vita, at Fiskimannafelagið hevði meldað Anitu millum annað fyri manningarviðurskiftini. Ikki fyrr enn 11.apríl í ár meldar Vørn Anitu, men tað var fyri at bróta kunngerðina um fiskiskap eftir havtasku og svartkalva við gørnum á føroysku landleiðini.

Undrast á eftirlitið

Gunvør Balle, løgtingskvinna, undrast á, at eingin eftirlitsmyndugleiki gjørdi vart við seg, eftir at Fiskimálaráðið fyrst í mars í fjør fekk at vita, at Fiskimannafelagið hevði meldað Anitu. Fyri tveimum mánaðum síðani spurdi Gunvør Balle tríggjar landsstýrismenn um Anitu. Nú hevur hon aftur spurt Jacob Vestergaard um Anitu. 

Ákæruvaldið hevur skrivað ákærurit móti reiðarínum og skiparanum á Anitu fyri sjey brot á kunngerðina um fiskiskap eftir havtasku og svartkalva við gørnum á føroysku landleiðini. Føroya rættur hevur ikki viðgjørt hetta málið enn.

Sjóvinnustýrið viðger málið

Og Sjóvinnustýrið er ikki liðugt at viðgera málið um vanlukkuna, tá Anita misti ein mann tann 11.februar. Vørn tók loyvið at fiska frá Anitu í ein mánað. Anita fekk loyvið aftur 19.mai.