Sildaavtalan er bert galdandi í ár

Jacob vestergaard, landsstýrismaður í fiskivinnumálum vil ikki gera viðmerkingar til avtaluna, sum er gjørd við ES um sildina.

- Vit hava avtalað, at landsstýrisfundur verður kl. 11 fyrrapartin, og tá tann fundurin er liðugur, verður kunnað um avtaluna, sigur landsstýrismaðurin.

Hann var saman við Kaj Leo Holm Johannesen, løgmanni á fundi við Uttanlandsnevndina hjá løgtinginum í gjár. Teir fundirnir eru vanliga í trúnaði, og tí vil Jacob Vestergaard heldur ikki gera viðmerkingar til tann fundin.

Jacob Vestergaard sigur kortini so mikið, at avtalan við ES bert er galdandi fyri í ár.

Tað hevur ljóðað síðani í gjár, at føroyska sildakvotan í ár verður 9,56 prosent, 40.000 tons.  9,56 prosent eru 4,40 prosentstig meira enn ES og hini strandarlondini upprunaliga vildu lata Føroyum, tí býtislykilin frá 2007 sigur, at Føroyar eiga 5,16 prosent.

Ikki er greitt enn, um hini strandarlondini, Noreg, Ísland og Russland, taka undir við, at Føroyar fáa størri sildakvotu.

Samráðast aftur í september

Í september fara strandarlondini aftur at samráðast um norðhavssildina og kvoturnar fyri 2015.

Føroyar fara at standa á odda fyri teimum samráðingunum. Tær fara at byggja á úrslitini frá fiskifrøðingum, sum eru í ferð við at gera nýtt grundarlag fyri sildabýtinum.

Fyrst í september í fjør fingu Føroyar undirtøku fyri einum uppskoti um at seta fiskifrøðingar at gera nýtt tilmæli um grundarlagið fyri sildabýtinum í framtíðini.

Liðugur í heyst

Arbeiðsbólkurin skal vera liðugur fyri 1.september í ár, so strandarlondini hava okkurt nýtt at byggja samráðingarnar á um kvotuna fyri 2015, og árini eftir 2015.   Í frágreiðingini hjá fiskifrøðingunum skal vera tilfar frá 1995 til 2013 um havlívfrøðiligar rannsóknir og fiskiskap eftir norðhavssild.