Thor hevur aftur keypt Grunnabarð

Aftur í ár hevur Thor keypt uppsjóvarskipið Grunnabarð frá South Pelagic í Vági.

South Pelagic hevur eingi loyvi at fiska sild, makrel ella svartkjaft, men tað hevði Thor í fjør. Thor hevur tó ikki skip til at fiska uppsjóvarfisk. Tí keypti Thor í fjør Grunnabarð at brúka uppsjóvarloyvini hjá Thor.

Fáa helst loyvi

Av tí at Thor slapp at fiska sild og makrel í fjør, fær felagið í Hósvík ivaleyst loyvi aftur í ár. Men South Pelagic fær neyvan loyvi, tí Jacob Vestergaard, landsstýrismaður, hevur sagt, at nýggir "aktørar" sleppa ikki upp í part, tá loyvini at fiska sild og makrel í ár verða latin. 

Kunngerðin ikki lýst enn

Landsstýrismaðurin ger tá samstundis vart við, at kunngerðin um fiskiskapin í ár er ikki lýst enn. Kunngerðin skuldi latast Fiskivinnuráðnum til ummælis í hesari vikuni.  

Grunnabarð hevur bara eittans fiskiloyvi, royndarloyvi at fiska hvítingsbróður til hálvan juli.