Veiðuloyvið hjá Anitu: Løgmaður avgerandi orðið

Løgmaður ger av, um garnaskipið Anita sleppur aftur til fiskiskap við føroyskum veiðiloyvi.

Tað sigur Jacob Vestergaard, landsstýrismaður, í svari til Gunnvør Balle, løgtingskvinnu. Hann sigur, at Vørn hevur nevnt møguleikan at taka aftur veiðiloyvi og tá øll fiskirættindini hjá Anitu.  Heimildina at gera tað hevur landsstýrismaðurin í fiskivinnumálum.

Umsitingin ógegnig

Men av tí at umsitingin hjá landsstýrismanninum er ógegnig at viðgera málið, hevur løgmaður avgjørt sjálvur at viðgera og avgera, um veiðiloyvið hjá Anitu skal takast aftur. 

Jacob Vestergaard, landsstýrismaður, sigur eisini í svari sínum, at Anita fekk ikki loyvi til at blaka fisk út, tá gørnini vórðu drigin eftir at Anita hevði verið inni, tí manningin skuldi geva sjófrágreiðing um vanlukkuna 11.februar, tá Anita misti ein mann.

Vildi ikki gevast

Vørn gav skiparanum á Anitu boð um, at útblakingin var ólóglig. Men skiparin vildi ikki gevast, tí at frystilastin var sløkt fyri at gera pláss fyri øllum gørnunum. 

Fiskiveiðieftirlitið hevur ikki løgreglumyndugleika á sjónum og vildi ikki kalla Anitu inn, sum var einasta heimild til at forða útblakingini, fyrr enn øll gørnini vóru drigin, sigur Jacob Vestergaard.