1000-2000 mist gørn fiska á landgrunninum

Tað kunnu standa millum 1000 og 2000 gørn kring oyggjarnar, sum eru mist, men sum kortini fiska.

Tað kemur fram í svarinum frá Jacob Vestergaard, landsstýrismanni, til fyrispurning frá Gunnvør Balle, løgtingskvinnu, um Anitu.

Ein av spurningunum frá løgtingskvinnuni var, um landsstýrismaðurin kann veita trygd fyri, at øll gørnini vórðu drigin? Svarið frá Jacob Vestergaard er nei, at tað kann hann ikki.

Altíð vandi at missa gørn

Hann sigur, at tá loyvt er at royna við gørnum undir Føroyum, er altíð vandi fyri, at skip missa gørn. Tey hava tó skyldu at fáa fatur á gørnunum aftur, og at boða Vørn frá, tá gørn verða mist.

Jacob Vestergaard sigur í svarinum, at Vørn í 2006 gjørdi eitt átak at dreggja, har garnaskip vanliga royna. Økið har dreggjað varð, strekti seg 13 fjórðingar ígjøgnum kantin norðan fyri Skeivabanka, millum 200 og 500 metra dýpi.

Fongurin var 77 havtaskugørn og eitt garnavarp við standara. Gørnini vórðu ikki fráboðað sum mist, og tað er ein greið ábending um, at mist grøn standa kring landgrunnin.

1000-2000 gørn

Út frá royndini í 2006, hevur Vørn mett, at tað kunnu standa millum 1000 og 2000 gørn kring oyggjarnar, sum eru mist, men eingin fráboðan er komin um tey, sigur landsstýrismaðurin í svarinum.

Elmar Højgaard, stjóri í Vørn sigur, at tað er sera sjáldan, at Vørn fær fráboðan um, at gørn eru mist.