ES skal ávirkast at taka undir við hvalaveiði

Grønlendski landsstýrisformaðurin, Aleqa Hammond, hevur saman við danska uttanríkisráðharranum, Martin Lidegaard, boðið trimum ES-uttanríkisráðharrum til Grønlands í september.  

Talan er um uttanríkisráðharrarnar úr Fraklandi, Týsklandi og Póllandi. Hesi trý londini hava sambært Alequ Hammond stóra ávirkan á hvalaveiðipolitikkin hjá ES. 

Endamálið við innbjóðingini er at ávirka ES-londini, so tey fáa betri fatan av grønlendska tørvinum og ynskjunum í hvalaveiðispurninginum. 

Veiðan er burðardygg

- Vit ætla at vísa teimum, at grønlendska hvalaveiðan er burðardygg. Eg hugsi eisini, at slík vitjan hevur týdning fyri at fáa undirtøku fyri krøvum okkara, sigur Aleqa Hammond við grønlendska kringvarpið og vísir á, at fleiri ES-lond als ikki skilja grønlendsku mentanina og tørvin fyri hvalaveiðu. 

Grønlendska hvalaveiðan verður avmarkað av altjóða hvalaveiðunevndini. 

Teir tríggir uttanríkisráðharranir hava ikki svarað grønlendsku innbjóðingini enn.