Gerðarrættur: Forskúlastørv eru flokkað

Størvini hjá pedagogum í forskúlunum eru ikki flokkað.

Tað siga bæði Pedagogfelagið og Kommunala Arbeiðsgevarafelagið, sigur advokaturin hjá Pedagogfelagnum.

Men meirilutin í Fasta Gerðarrættinum sigur, at størvinum hjá pedagogum í forskúlunum eru longu flokkað í sáttmálanum millum Pedagogfelagið og kommunurnar. 

Tí kann Pedagogfelagið ikki lýsa verkfall í forskúlunum, sigur Fasti Gerðarrætturin.

Undrast á úrskurð 

Sigmund Poulsen, advokatur hjá Pedagogfelagnum, undrast á, at høvuðsgrundarlagið undir úrskurðinum hjá Fasta Gerðarrættinum er, at størvini í forskúlunum longu eru í sáttmálanum fyri pedagogar, tí tey hava verið lønt eftir hesum sáttmála í nøkur ár. Og ongar ásetingar um forskúla komu í nýggjasta sáttmálanum, sum varð gjørdur 15.januar í ár.

Sigmund Poulsen sigur við heimasíðuna hjá Pedagogfelagnum, at partarnir settu sjálvir 1.mai í ár sum freist fyri at gera flokkingina. Tað eydnaðist tó ikki.

Pedagogfelagið noktaði tí limum sínum at søkja størv í forskúlunum og boðaði frá arbeiðssteðgi har 17.august.

KAF og flokking

Men felagið hevur nú avlýst hesi tiltøk, eftir at Kommunala Arbeiðsgevarafelagið fekk viðhald í Fasta Gerðarrætti.

Sigmund Poulsen sigur, at í juli í fjør skrivaði Kommunala Arbeiðsgevarafelagið til Pedagogfelagið, at forskúlaøkið og innihaldið í pedagogstarvinum eru ikki nóg væl lýst til at fáa flokkingar gjørdar, áðrenn skúlarnir byrja aftur eftir summarsteðgin.

Arbeiðsgevarafelagið mælti tí til í juli í fjør, at partarnir arbeiddu víðari við flokkingunum komandi árið.  

Sigmund Poulsen vísir síðani á, at í tí eina málskravinum, sum Kommunala Arbeiðsgevarafelagið sendi Fasta Gerðarrættinum 23.juni í ár, stendur, at Pedagogfelagið vil ikki føra veruligar og seriøsar samráðingar um at flokka størvini hjá pedagogum í forskúlunum.

Advokaturin hjá Pedagogfelagnum undrast tí á, at Fasti Gerðarrætturin sigur, at størvini eru flokkað, tá báðir sáttmálapartarnir siga, at tað eru tey ikki.