Kommunulækni skuldsettur fyri kynsligan ágang

<p>Løgreglan hevur avhoyrt ein kommunulækna í Føroyum og skuldsett hann fyri at hava framt kynsligan ágang móti fimm kvinnum, ið hava verið til læknaviðtalu hjá honum.</p>

<p>Kommunulæknin skal - millum annað í samband við undirlívskanningar - hava framt kynsligan ágang. Kvinnurnar eru millum 20 og 30 ára gamlar.</p>

<p>Løgreglan hevur kannað mannagongdirnar í sambandi við undirlívskanningar, fyri at vita, hvat ein lækni ger í tí sambandinum.</p>

<p><strong>Málið latið ákærumyndugleikanum</strong></p>

<p>Løgreglan metir, at maðurin hevur framt kynsligan ágang tá og í øðrum sambandi, og tí er hann skuldsettur. Málið er latið ákærumyndugleikanum, ið síðani skal reisa ákæru.</p>

<p>Danski ríkisadvokaturin hevur fingið fráboðan um skuldsetingina móti læknanum, ið er skuldsettur fyri at hava framt kynsligan ágang móti teimum fimm kvinnunum.</p>

<p>Setanarmyndugleikin er Heilsutrygd. John D. Olsen, ið varar av kommunulæknaskipanini, kennir ikki ítøkiliga málið, og vil tí ikki gera viðmerkingar til málið beint nú.</p>