Avhoyringarnar halda fram um mánaðarskiftið

Avhoyringarnar hjá Hans Gammeltoft-Hansen, sum kannar málið um privata Eysturoyartunnilin fyri løgtingið, halda fram síðst í august og fyrst í september. 

Hósdagin 28.august verður Kaj Leo Holm Johannesen, løgmaður, avhoyrdur og dagin eftir Kári P. Højgaard, sum var landsstýrismaður í innlendismálum. 

Og mánadagin 1.september skal Marjun Hanusardóttir, løgmansstjóri, avhoyrast.

Fleiri avhoyringar eru ikki á skránni sum er. 

CIP-menn verða ikki avhoyrdir

Í løtuni er ikki ætlanin at avhoyra nakran hjá Copenhagen Infrastructure Partners, sum skuldu gera og eiga Eysturoyartunnilin.

Síðst í juni avhoyrdu Hans Gammeltoft-Hansen og hansara fólk Sjúrð Rasmussen, ráðgeva á Løgmansskrivstovuni, Nellu Festirstein, fyrrverandi deildarstjóra í Innlendismálaráðnum, Ewald Kjølbro, stjóra á Landsverki, Kaj Johannesen, fulltrúa í Innlendismálaráðnum, Rúna Joensen, fyrrverandi aðalstjóra í Innlendismálaráðnum, Aksel V. Johannesen, formann í Javnaðarflokkinum og Høgna Hoydal, formann í Tjóðveldi.