Vørn hevði heimild at sýta umbøn um upplýsingar

Vørn hevði heimild at sýta eini umbøn um innlit í upplýsingar um avreiðingarprísir, sum vórðu ætlaðar til hagtøl.

Tað sigur Løgtingsins umboðsmaður, sum hevur viðgjørt eina kæru um málið.

Fiskimálaráðið staðfesti avgerðina hjá Vørn, sum sýtti umbønini um innlit við tí grundgeving, at upplýsingarnar skuldu brúkast til almenn hagtøl, og at tær tí ikki vórðu fevndar av rættinum um innlit.

Tekur undir við avgerðini

Umboðsmaðurin tekur undir við grundgevingini og staðfestir, at greið lógarheimild er at savna upplýsingar, sum skulu nýtast til hagtøl. Umboðsmaðurin staðfestir eisini, at Vørn nýtti ikki upplýsingarnar til fyrisitingarligt virksemi, og at ætlanin var at almannakunngera hagtølini.

Umboðsmaðurin hevur onga viðmerking til avgerðina hjá Vørn um ikki at lata meirinnlit í upplýsingarnar. 

Les avgerðina hjá Umboðsmanninum her