90 bíða eftir vardum bústaði

Fyri tveimum vikum síðani bíðaðu 90 fólk eftir at fáa vardan bústað í Føroyum, teirra millum vóru níggju yngri enn 18 ár. 

Talið broytist alla tíðina, sigur Annika Olsen, landsstýriskvinna, í svari til Rósu Samuelsen, løgtingskvinnu. Bíðilistin broytist, so hvørt sum útboðið veksur, og tíðindi berast um nýggja bygging. 

Til dømis fekk Almannaverkið fleiri umsóknir, tá tíðindini bórust um, at sambýlið Eystan Heyg í Havn var um at verða liðugt, og tá tað frættist, at sambýli skulu byggjast í Runavík og í Klaksvík.

Bú- og viðgeraðarstaður

Í svarinum stendur eisini, at Almannaverkið kann geva ungum við serligum tørvi uppihald á bú- og viðgerðarstaði.

Slíkt tilboð er í Børkugøtu í Havn, har níggju ungfólk búgva. Fólk flyta inn, so hvørt sum pláss eru tøk. Eingin er á bíðilista í løtuni til bú- og viðgerðartilboð av hesum slagi í Føroyum.

Men Almannaverkið hevur ikki tað, sum verður nevnt útslúsingartilboð, til ung við serligum tørvi.