Uppskot um at einskilja landsjørðina kemur í vár

Tekur landsstýrið undir við tí, fer Jacob Vestergaard at leggja uppskot fyri løgtingið um at einskilja almennu jørðina seint á vári næsta ár. 

Í oktober í fjør fekk Jacob Vestergaard loyvi frá landsstýrinum at arbeiða við málinum, og 1.juli í ár fekk hann álitið frá arbeiðsbólkinum, sum varð settur at greina málið um almennu jørðina. 

Jacob Vestergaard, sum hevur svarað spurningum frá Bjørt Samuelsen, løgtingskvinnu, um landsjørðina, sigur, at politiskt er ikki avgjørt enn, hvussu nógv, jørðin skal seljast fyri.

Heldur ikki er avgjørt, um Búnaðargrunnurin kann lata fígging til at keypa landsjørð.

Jacob Vestergaard sigur, at væntandi verður kravt, at almenn jørð, sum verður einskild, skal brúkast til landbúnað.