Tingmanningin viðger atkvøðugreiðslu um fiskidagar

Tingmanningin hjá Sambandsflokkinum fer nú at viðgera avgerðina hjá Eivini Jacobsen at atkvøða ímóti uppskotinum hjá Jacobi Vestergaard, landsstýrismanni, um óbroyttar fiskidagar, men fyri uppskotinum hjá andstøðuni um at skerja fiskidagarnar fimm prosent.

Eivin Jacobsen sigur, at samgongan tekur ikki tilráðingarnar frá Havstovuni í nóg stórum álvara, og tað er høvuðsorsøkin til, at hann atkvøddi, sum hann gjørdi. Hann heldur, at álitið frá andstøðuni í Vinnunevndini var nærri tí, sum stendur í samgonguskjalinum, enn álitið frá samgonguni

Alfred Olsen, formaður í tingbólkinum hjá Sambandsflokkinum, sigur, at enn hevur flokkurin ikki tikið støðu til spurningin um atkvøðugreiðsluna hjá Eivini Jacobsen. Tað verður viðgjørt innanhýsis fyri triðju viðgerð í morgin, sigur hann.

Skerjingar í fjør

Í fjør mælti helvitn av tingmanningini hjá Sambandsflokkinum, tað vóru Eivin Jacobsen, Reimund Langgaard, Helgi Abrahamsen og Rósa Samuelsen, til at fylgja fiskifrøðini og skerja fiskidagarnar munandi. 

Samgongan samtykti tá eitt broytingaruppskot við lítlum niðurskurði, sum var  minni enn fiskifrøðin mælti til.

Í 2011 fekk Johan Dahl, sum tá var landsstýrismaður í fiskivinnumálum, eina umsitingarætlan frá einum arbeiðsbólki, sum segði, at í seinasta lagi í 2015 skal allur fiskiskapur eftir toski, hýsu og upsa í føroyskum sjógvi vera lívfrøðiliga og búskaparliga burðardyggur.

Í arbeiðsbólkinum, sum gjørdi ætlanina, vóru umboð fyri Fiskimálaráðið, Havstovuna, Fiskidaganevndina og vinnuna.    

Í samgonguskjalinum stendur beinleiðis, at umsitingarætlanin frá 24.oktober 2011 verður grundarlag undir viðgerðini av framtíðar reguleringum av fiskiskapinum av høvuðsfiskasløgunum, toski, hýsu og upsa.