Gera nú Sjóvinnuhúsið liðugt

Tórshavnar býráð samtykti í gjárkvøldið at játta góðar 74 milliónir krónur av íløgunum hjá Tórshavnar havn til at gera Sjóvinnuhúsið liðugt.

Við nýumvælda bygninginum á Vestaru bryggju fær sjóvinnan møguleika at húsast undir somu lon. 

Hølini kunnu nýtast til eitt nú oljuvinnu, offshore, havtøkni, aling og gransking. Eisini er t ætlanin at hýsa íverksetan og skeiðvirksemi.

- Eftirspurningurin eftir at leiga skrivstovuhøli í Sjóvinnuhúsinum hevur verið stórur, hóast bygningurin ikki verður endaliga liðugur fyrr enn um árskiftið 2015/2016, sigur Sjúrður Olsen, sum er formaður í Vinnunevndini í Tórshavnar býráði.

Fimm hæddir

Bygningurin er í fimm hæddum, sum skulu hava 2800 fermetrar av skrivstovum, einar 2200 fermetrar til felagsøki, og harumframt verður goymsla, verkstað, tøknirúm og matstova.

Skitsuprosjektið varð gjørt og góðkent seinasta heyst. Arbeiðið hevur síðan verið boðið út, men tilboðini vórðu mett at vera nakað dýr, og tí varð farið at samráðast við tey feløg, sum høvdu lægstu tilboðini. 

- Samlaði kostnaðurin fyri bæði klæðing og innrætting er nú umleið 94 milliónir krónur, t.v.s. at 7.100 fermetrar fáast fyri 13.200 krónur fyri hvønn fermetur, sigur Sjúrður Olsen.

Havnarmeistarin, Jónsvein Lamhauge, mælti herfyri til at gera arbeiðstøkusáttmálar við feløgini og at játta góðar 74 milliónir krónur burtur av íløgunum hjá Tórshavnar havn fyri 2014 og 2015. Og hetta samtykti býráðið í gjárkvøldið.