Gerðarrættarmálini móti ES tikin aftur

Partarnir hava loyst trætuna, og tí er ikki grundarlag fyri at halda fram við gerðarrættarmálunum

Bjørn Kunoy og Esa Paasivirta, leiðarar í sendinevndunum fyri ávikavist Føroyar og ES í gerðarrættarmálinum, og Andre Bouquet, næstformaður hjá ES-sendinevndini. Myndin varð tikin, tá ið felags áheitanin varð send gerðarrættinum

Johnsigurd Johannesen

21.08.2014 - 13:39

Fyrrapartin hava Føroyar og ES formliga steðgað altjóða gerðarrættarmálunum, sum Føroyar settu í verk í sambandi við handilstiltøkini hjá ES móti Føroyum.

Bræv er í morgun sent gerðarrættinum, ið varð stovnaður við støði í havrættarsáttmála Sameindu Tjóða. Í brævinum verður gjørt greitt , at partarnir hava loyst trætuna, og tí er ikki grundarlag fyri at halda fram við gerðarrættarmálinum.

Sama fráboðan er eisini send til gerðarrættarskipanina hjá heimshandilsfelagsskapinum WTO.

Avgerandi leiklut

- Avgerðin hjá Landsstýrinum at fara undir tvey altjóða gerðarrættarmál, tey fyrstu av sínum slagi, hava víst seg at havt avgerandi leiklut í málinum. Vit fegnast um, at tað loksins eydnaðist loksins at finna eina semju í málinum. Nú sambandið millum Føroyar og ES aftur í rættari legu, sigur Kaj Leo Holm Johannesen, løgmaður.

Handilssáttmálin millum Føroyar og ES er frá 1996. Nú viðurskiftini millum Føroyar og ES aftur eru komin í rættlag, skal ferð setast á arbeiðið at gera ein nýggjan fríhandilssáttmála við ES.

- Ósemjan um sildina og makrelin hevur órógvað tilgongdina við nýggja evropapolitikkinum. Okkara greiða mál er nú at fáa ein betri fríhandilssáttmála við ES, sigur løgmaður.