Nógvar føroyskar fyritøkur á oljustevnu

Stóra oljustevnan í Stavanger, Offshore Northern Seas, vanliga nevnd ONS, læt upp í gjár, og Føroyar eru væl umboðaðar á stevnuni.

Føroyar hava ein landabás, sum er samskipaður av Oljuvinnufelagnum, og eisini er eitt føroyskt tjald á festivaløkinum. 

Fyritøkurnar á básinum eru millum annað Atlantic Supply Base, Pam Offshore (MEST), Thor Offshore, Skansi Offshore, Kemilux, Atlantic Airways, Faroe Ship og havnirnar í Runavík, Havn, Vági og á Tvøroyri. Harafturat eru umboð fyri Jarðfeingi og Oljuvinnufelagnum við á stevnuni. 

Tórshavnar kommuna og Runavíkar kommuna standa fyri føroyska tjaldinum á festivaløkinum. Har fer Hotel Føroya at borðreiða við mati, og føroyskir tónleikarar fara at framføra. Sluppin Westward Ho liggur eisini við bryggju undir stevnuni, og í dag verður skipað fyri móttøku umborð.

Umleið 1.250 básar eru á stevnuni, og vanliga vitja eini 60.000 fólk. Oljustevnan endar hósdagin 28. august.