Seta løðistøðir upp kring landið

Jarðfeingi og SEV arbeiða við at gera umstøðurnar betri at hava el-akfør í Føroyum. Í løtuni verða møguleikar kannaðir at seta upp løðistøðir runt í landinum til el-bilar.

Tað stendur í frágreiðing, sum Jarðfeingi hevur almannakunngjørt.

Sum er, kunnu el-bilar bara løðast heima við hús, og tí er avmarkað, hvar teir kunnu koyra.

30 krónur at løða

Ein løðistøð kostar umleið 15.000 krónur, og tað tekur umleið seks tímar at løða bilin. Og tað er ikki dýrt at løða bilin - einar 30 krónur, stendur í frágreiðingini.

Og fyri at seta gongd á, kann verða talan um ókeypis løðingar at byrja við, skrivar Jarðfeingi, sum væntar, at kommunur og størru fyritøkurnar í landinum hava áhuga í at seta upp slíkar løðistandarar.