Jacob Vestergaard vitjar Mariu Damanaki

Á middegi í dag fær Maria Damanaki, ES-fiskivinnukommisserur, gest úr Føroyum í heimlandi sínum Grikkalandi.

Jacob Vestergaard, landsstýrismaður í fiskivinnumálum, er farin á almenna vitjan í ES. Vitjanin byrjar á middegi í dag í Aten, har Maria Damanaki tekur í móti sendinevndini úr Føroyum. 

Vitjar Akropolis

Í morgin fara Jacob Vestergaard og Maria Damanaki at viðgera, hvussu uppsjóvarfiskurin í Norðuratlantshavi skal umsitast í framtíðini. Harumframt verða fornsøgulig støð vitjað, eitt nú Akropolis. 

Fríggjakvøldið bjóðar Maria Damanaki til døgurða í havnarbýinum Pireus. Almenna vitjanin hjá Jacob Vestergaard í ES endar á middegi leygardagin.