Trygd: Nógvir skaðar fyrra hálvár

Trygd hevði 3,8 mió. kr. í avlopi eftir skatt fyrra hálvárið.  Úrslitið var sjey milliónir krónur betri í fjør.

Janus Thomsen, stjóri í Trygd, sigur, at nógvir skaðar merktu fyrra hálvárið, ikki stórir skaðar, men nógvar miðalstórar skaðar. Skaðarnir í ár eru 2058. Teir vóru 1651 í fjør.  

Bruttoskaðaendurgjøldini hækkaðu úr 20,9 mió.kr. í fjør upp í 27,8 mió.kr. í ár. 

Bruttoinntøkurnar frá tryggingargjøldum minkaðu úr 44,6 mió. kr. í fjør niður í 41,9 mió. kr. í ár. 

Eginognin hjá Trygd, sum BankNordik eigur, var slakar 80 mió. kr. tann 30.juni. Partapeningurin er 40 milliónir krónur. 

Felagið metir, at nettoúrslitið fyri alt árið 2014 verður um átta til tíggju mió. kr. 

Eins og Tryggingarfelagið Føroyar hevur Trygd varnast, at útlendsk feløg, umvegis meklarar, royna at gera seg galdandi á føroyska marknaðinum. Enn er tó bara talan um tryggingar fyri vinnuvirki og skip.

Lógarbroytingin frá 2010 loyvir eisini føroyskum tryggingarfeløgum at selja tryggingar og tryggingartænastur í Danmark. Í løtuni hevur Trygd tó ongar ítøkiligar ætlanir um at virka í Danmark í 2014.