Anita útgjørd til fiskiskap eitt ár í senn

Garnaskipið Anita varð umbygt í Spania um seinasta ársskiftið til at kunna vera útgjørt til fiskiskap í eitt ár í senn.

Skipið, sum er skrásett í Føroyum, er útgjørt úr Spania. Fyri at sleppa undan at skula so ofta til Spania, varð skipið umbygt til at kunna hava meira reiðskap og útgerð. 

Ætlanin var eisini at virka fiskin umborð. Tí kravdist munandi størri manning.

Hesar eru einastu orsøkirnar til umbyggingina. Hon hevur einki við skipaðan ólógligan fiskiskap at gera, sum reiðaríið er vorðið skuldsett fyri.

Tað sigur Jens Andrias Vinther, advokatur hjá P/f Seta, reiðaríinum hjá Anitu, í hoyringarskrivi, nú løgmaður ætlar at taka veiðiloyvið frá Anitu.

Hann sigur eisini við at vísa á tøl hjá Vørn, at Anita fiskar ikki meira enn onnur føroysk garnaskip.