Lægri renta krevur minni stuðul frá tí almenna

Lækkaða sethúsarentan ger, at landskassin sparir eina millión krónur í ár, og kommunurnar spara 800.000 kr.

Í eykajáttanarlógini, sum nú er komin í løgtingið, verður biðið um, at játtanin til rentustuðulin minkar 1,8 milliónir krónur, tí sethúsarentan hjá peningastovnunum er lækkað.

Landskassin fer at brúka eina millión minni og kommunurnar 800.000 kr. minni, sigur ein dagførd meting hjá Fíggjarmálaráðnum.

Slakar 100 milliónir 

Sambært fíggjarlógini fyri 2014 kostar rentustuðulin 98 mió. kr. Í uppskotinum um eykajáttanarlóg verður biðið um, at játtanin lækkar niður í 96,2 mió. kr.

Landskassin sparir eina millión netto. Tí kommunurnar skuldu flyta landinum 45,5 milliónir til rentustuðulin í ár, men tann flytingin fer niður í 44,7 mió. kr. 

Landið og kommunurnar býta útreiðslurnar til rentustuðulin millum sín.