Raðfestir trygdina á sjónum við fleiri pengum

Trygd á sjónum er millum raðfestingarnar hjá landsstýrinum í fíggjarlógaruppskotinum fyri 2015.

Sjóvinnustýrið, sum er Skipaeftirlitið og Skipaskrásetingin, hevur fingið 1,8 mió. kr. afturat.

Sambært Vinnumálaráðnum fer størsti parturin av hækkaðu játtanini til trygdina á sjónum.

Egnar inntøkur 

Landskassin skal sjálvur lata eina millión av hækkaðu játtanini. Sjálvt skal Sjóvinnustýrið útvega 800.000 kr. við øktum inntøkum av eftirlits- og umsjónaravgjøldum. 

Skipaeftirlitið fer næsta ár at gera samstarvsavtalu við Den Maritime Havarikommision í Danmark.

Sambært samstarvsavtaluni verður kanningararbeiðið í sambandi við óhapp og vanlukkur á sjónum styrkt, sigur Vinnumálaráðið. 
Á landsstýrisfundinum mánadagin vóru til viðgerðar upprit og uppskot um at broyta løgtingslógina um trygd á sjónum.