Ongar samráðingar um limaskap og eingin stuðul

Ongar tingingar um íslendskan limaskap í ES hava verið síðani í mai í fjør, tá nývalda íslendska stjórnin avgjørdi at steðga við samráðingunum um treytirnar fyri limaskap.

Tað stendur í nýggjari frágreiðing frá deildini hjá ES, sum umsitur samráðingar við lond, sum spyrja um limaskap. 

Støðan hjá íslendsku stjórnini hevur eisini gjørt, at IPA-stuðulin frá ES til Íslands so líðandi heldur uppat. 

Missir stuðul

Lond, sum hava spurt um limaskap í ES, fáa IPA-stuðul til umsiting og undirstøðukervi. Endamálið við stuðlinum er at gera londini betur før fyri at vera við í evropeiska samstarvinum.

Ísland hevur fingið IPA-stuðul til millum annað at útbúgva vaksin fólk og endurbúgva fólk, so tey kunnu fara til arbeiðis.

ES leggur tó dent á, at Ísland er framvegis týðandi samstarvspartur hjá ES. Ísland er í EBS, Schengen og í Arktiska ráðnum.