Donsk lóg í Føroyum stórt framstig í sálarfrøðini

Tað er eitt risastig framá, at danska lógin um løggilding av sálarfrøðingum nú eisini er galdandi í Føroyum, sigur felagið Føroyskir sálarfrøðingar.

Tað er umráðandi at staðfesta í lóg, hvør kann brúka heitið sálarfrøðingur. Higartil hevur so at siga hvør Hanus og Janus kunnað boðið seg fram sum sálarfrøðing. Tað ber ikki til longur, sigur felagið.

Nú er ásett við lóg, hvør kann brúka heitið sálarfrøðingur, hvør kann fáa løggilding sum sálarfrøðingur og hvørjar treytir, eitt nú um viðurkenda útbúgving, fylgja við løggildingini. 

Lógartrygd

Hetta merkir fyrst og fremst, at viðskiftafólk hjá sálarfrøðingi hava lógartrygd fyri tænastuna, tey hava biðið sálarfrøðingin um. 

Og tey hava eisini rætt til at kæra, um sálarfrøðiliga veitingin ikki er sambært lógini, ella um tey eru ónøgd við tænastuna. 

Sambært lógini hava sálarfrøðingar tagnarskyldu. Men lógin sigur eisini, at sálarfrøðingar hava víðkaða upplýsingarskyldu, til dømis tá talan er um børn, sum eru í vanda fyri at vera fyri umsorganartroti. 

Avgerðir í Danmark

Psykolognævnet í Danmark avger, hvør lýkur treytirnar fyri at kalla seg løggildan sálarfrøðing í Føroyum. Nevndin hevur eisini eftirlitið við sálarfrøðingum í Føroyum.

Aganevdnin hjá danska heilsuverkinum viðger kærur um sálarfrøðingar í Føroyum. 

Lógin um sálarfrøðingar kom í gildi í Føroyum 12.oktober.