Kravið er omanfyri tríggjar milliardir

Fíggjarligt Støðufesti krevur tilsamans meira enn tríggjar milliardir krónur frá teimum, sum høvdu ábyrgdina av, at sjey bankar fóru á húsagang eftir fíggjarkreppuna. Í nøkrum málum er grannskoðanin eisini stevnd eftir endurgjaldi.

Millum bankarnar eru Eik Banki, bæði í Danmark og í Føroyum. Kravið ímóti danska bankanum er 250 milliónir kr. og ímóti føroyska bankanum 150 milliónir kr., tilsamans 400 milliónir kr.

Í Capinordic Bank eru tríggir stevndir eftir 400 milliónum kr. í endurgjaldi, men grannskoðanin er ikki stevnd. Sakarmálið byrjaði mánadagin og skal eftir ætlan enda í apríl næsta ár.

Í Roskilde Bank eru 11 fólk kravd eftir einari milliard kr. Sakarmálið byrjar 7. september næsta ár, og skal vera liðugt í januar í 2017.

Í Amagerbankanum eru eisini 11 fólk kravd eftir 801 milliónum kr., men grannskoðanin er ikki stevnd. Sakarmálið byrjar í Lyngby 6. apríl í 2016, og væntast at vara í meir enn eitt ár.

Í EBH-bankanum eru 17 fólk stevnd fyri rættin og kravið er 700 milliónir kr. Málið byrjar í vestara landsrætti 4. september í 2017 og skal vara tað nógva av 2018.

Í Eik banka Danmark eru átta fólk kravd eftir 250 milliónum kr. Eystari landsrættur hevur ikki enn sett málið á skránna. Tey stevndu hava biðið rættin um at vísa málið frá sær, men tey fingu ikki viðhald í tí.

Í Eik banka í Føroyum eru fimm stevnd eftir 150 milliónum kr. Rætturin hevur ikki enn sett málið á skránna.

Í Løkken Sparikassa eru sjey fólk stevnd eftir 275 milliónum kr. Vestari landsrættur hevur ikki sett málið á skrá enn.