Tað almenna í Føroyum undirskot sætta árið á rað

Sætta árið á rað hevði tað almenna í Føroyum hall í 2013.

Hallið hjá í fjør var 367 mió. kr., 85 milliónir meira enn í 2012. Hallið hjá tí almenna var 2,6 prosent av BTÚ, bruttotjóðarúrtøkuni, í fjør.

Landið eigur nógv tann størsta partin av almenna hallinum, 341 milliónir í fjør, 60 milliónir meira enn í 2012, upplýsir Hagstovan.

Kommunur aftur hall

Kommunurnar høvdu yvirskot í trý ár, ikki stórt, men kortini 30-40 milliónir krónur um árið. Men í fjør høvdu tær hall, 45 mió. kr.

Og hjá sosialu grunnunum, Samhaldsfasta, Heilsutrygd, ALS, Barsilsgrunninum og øðrum, royndist 2013 betur enn árini frammanundan. Grunnarnir høvdu 19 milliónir í yvirskoti í fjør. 

Inntøkurnar hjá tí almenna vóru sjey milliardir og 371 milliónir í fjør. Útreiðslurnar vóru 367 milliónir størri, sjey milliardir og 738 milliónir krónur.

Sammett við 2012 vóru inntøkurnar hálvt annað prosent størri og útreiðslurnar hálvt triðja prosent størri í fjør.  

Øll tølini um fíggjarligu gongdina hjá tí almenna seinastu fimm árini eru á heimasíðunu hjá Hagstovuni, hagstova.fo.